तुलना

       तुलना

तुलना आपण का करावी?
चिऊच्या चिवचिवटाला,
कुहूच्या स्वरांची
अपेक्षा का धरावी?

सूर्याच्या तेजाने तळपणे
चांदोबाला कसे जमेल?
चांदण्याची शितलता लेऊन
भास्कराचे मन कसे रमेल?

पाणी पिऊन तृष्णा भागेल,
पोट कधी भरेल काय?
भरल्या पोटी उदकाशिवाय
तळमळ जीवाची हरेल काय!

निर्मात्याने ऋतू नेमले
दिवस रातीचे चक्र निर्मिले
गुण आणि धर्माच्या साथीने
सृष्टीने चराचर स्थापिले!

प्रत्येकाचे गुणधर्म न्यारे..
रंगूनी रंगात सारे,
जाणावा जिवनाचा अर्थ
सोडूनी विवंचना व्यर्थ!

                             - अनुप अशोक पवार
                                  दि.23-7-2016
                                         शनिवार

जीवन

               कसं जमतं
               सर्वांना जगणं?
               थोडया रिक्त जागा
               काही अवघड प्रश्न,
               चाळली जातात
               आयुष्याची पाने,
               कुणी गद्यात दंग
               कुणी काव्यात मग्न!

                जीवनाचा माग
                घेणेच व्यर्थ
                अपुलीच वाट
                अपुलेच स्वार्थ,
                 इथे प्रत्येकाचे
                 वेगळे तराने,
                 कुणी गाती निमूट
                 कुणी शोधती अर्थ!
              
                              - अनुप अशोक पवार
                                 22-01-2016

शब्दमेळ

नमस्कार मित्रांनो..

आज माझा ब्लॉग विश्वात 'शब्दमेळ' च्या माध्यमातून पहिलाच दिवस! या तश्या जुन्या पण माझ्यासाठी नव्या माध्यमातून संवाद साधण्याचा साधा प्रयत्न.तसा हां एकतर्फीच संवाद :) परंतु यातुन कदाचित माझा बोलघेवडेपणा वाढत जाईल आणि तसतसे या प्रवासातील माझे सोबतीही वाढत जातील अशी अपेक्षा!
         मला लिहायला आवडतं..चांगल,दर्जेदार वाचन हेही माझ्या छंदापैकी एक.जुन्या म्हणजेच अर्थपुर्ण संगीताचा आणि गाण्यांचा निस्सीम चाहता,आणि हो सगळ्यात महत्वाचं सर्व मराठी बांधवांप्रमाणे मी ही आहे माझ्या 'मायमराठी' चा भक्त🙏

                  "कसे होऊ उतराई?
                   मायमराठी अपुलि आई!
                   जन्मदात्रीने जग दाखविले
                   मायमराठीने जग शिकविले"

आराध्य श्रीगणेशाला वंदन आणि मायमराठीला नमन करून हां प्रवास सुरु करुया.धन्यवाद.